يا اللى قاعد فوق ... فوق ... فوق اوى
حاسس أو سامع صريخ البشر تحت؟
و لا بالصلصال عملتنا و بعد كده يا طناش؟
النهاردة الصبح و هو رايح على رزقه
جه موتوسيكل بسرعة و خبط الأوفة من على كتفه
رزقه ... تعبه الى كان هياكل بيه لمدة يومين
أهو على الأرض وقع ... ضاع
يا ترى حسيت او سمعت صوته و هو بيعيط؟
عمار بن صايغ أب لولدين
كل ولد منهم " عايز لما أكبر ابقى ذى بابا"
انهاردة و هو رايح شغله كان عارف انه مش راجع
غسلوله مخه أو هو مقتنع مش مهم .... المهم انه مش هيرجع
لافف شريط ديناميت و على أول شارع رئيسى
بوم .......
مات عمار بن صايغ
و أتيتم ولاد عمار بن صايغ
"مفيش بابا علشان نبقى ذيه"
يا ترى سمعت الكلمه دية و أنت قاعد فوق فوق فوق قوى؟
اسمه يوسف و دينه ما يميزوش أسمه
أهو نبى كان موجود عند التلات أديان
كلامه ساعات ساعات
مره حلو مره لأ
مره يعجبنى و ما يعجبش صاحبى
مره ما يعجبنيش و يعجب صاحبى
لكن يوسف كان مقتنع بكل الى قالوه
يوم ذى اى يوم كان نازل من بيتهم
مبسوط
انهاردة هيقابل ناس جديدة
انهاردة هيقول كلام جديد
أنهاردة ... طاخ طاخ طاخ
وقع يوسف بينزف
الكل أتفق انه لازم يموت عشان فكره مختلف
و مات بمنتهى السهولة
رد عليا بقى
أنت سامع و حاسس ولا مطنش كل المصايب الى بتجرى دية؟
أنت موجود ولا فضلت تمشى و تبتدى فى مكان جديد خليقة جديدة؟
ياهووا انت سامعنا ؟
يا اللى قاعد فوق ... فوق ... فوق اوى
حاسس أو سامع صريخ البشر تحت؟
و لا بالصلصال عملتنا و بعد كده يا طناش؟
No comments:
Post a Comment